उदयपुर — कोशी प्रदेश सरकारका उद्योग, कृषि तथा सहकारी मन्त्री मा. इस्राईल मन्सुरीले कृषि ज्ञान केन्द्र, उदयपुरको स्थलगत अनुगमन तथा निरीक्षण गर्नुभएको छ।

अनुगमनका क्रममा मन्त्री मन्सुरीले कृषि सेवा प्रवाहको वर्तमान अवस्था, किसानमुखी कार्यक्रमहरूको प्रभावकारी कार्यान्वयन तथा त्यस क्रममा देखिएका समस्या र चुनौतीबारे विस्तृत जानकारी लिनुभयो। उहाँले सेवा प्रवाहलाई अझ सरल, छरितो र प्रभावकारी बनाउन निर्देशन दिँदै कृषकका वास्तविक आवश्यकताअनुसार कार्यक्रम सञ्चालन गर्न जोड दिनुभयो।

त्यसै अवसरमा मन्त्री मन्सुरीले सम्बन्धित कर्मचारी तथा कृषकहरूसँग प्रत्यक्ष अन्तरक्रिया गर्दै उनीहरूको गुनासा, सुझाव र अनुभवहरू सुन्नुभएको थियो। कृषकहरूले अनुदान वितरण, प्राविधिक सहयोग र बजार व्यवस्थापनमा देखिएका समस्याबारे ध्यानाकर्षण गराएका थिए।

अनुगमनकै क्रममा मन्त्री मन्सुरीले विभिन्न कृषि फर्महरूको समेत निरीक्षण गर्दै उत्पादन वृद्धि, आधुनिकीकरण र व्यावसायिक कृषिमा जोड दिन आवश्यक रहेको उल्लेख गर्नुभयो।

मन्त्री मन्सुरीले कृषि क्षेत्रलाई प्रदेशको आर्थिक मेरुदण्डका रूपमा विकास गर्न सरकार प्रतिबद्ध रहेको स्पष्ट पार्दै, किसानमैत्री नीति र कार्यक्रमलाई प्रभावकारी रूपमा कार्यान्वयन गरिने विश्वास व्यक्त गर्नुभयो।