काठमाडौं — केपी शर्मा ओली र रमेश लेखक लाई थुनामा राखेर अनुसन्धान अघि बढाउन अदालतले आदेश दिएको छ।

आइतबार जिल्ला अदालत काठमाडौं का न्यायाधीश आनन्दप्रसाद श्रेष्ठ को इजलासले दुवै जनामाथि अनुसन्धानका लागि ५ दिनको म्याद थप गर्न अनुमति दिएको हो। अदालतको आदेशअनुसार उनीहरूलाई हिरासतमा राखेर थप अनुसन्धान गरिनेछ।

जिल्ला सरकारी वकिल कार्यालयले दुवैलाई थुनामै राखेर अनुसन्धान गर्न माग गरेको थियो। सोही मागलाई अदालतले स्वीकार गर्दै म्याद थपको अनुमति दिएको जानकारी सहन्यायाधिवक्ता दिपक कुमार श्रेष्ठ ले दिएका छन्।

गत भदौ २३ र २४ गते भएको जेनजी आन्दोलन का क्रममा भएको दमन प्रकरणमा उनीहरूलाई अनुसन्धानको दायरामा ल्याइएको हो। उक्त आन्दोलनका बेला ओली प्रधानमन्त्री तथा लेखक गृहमन्त्रीको जिम्मेवारीमा थिए।

आन्दोलनका क्रममा भएको दमनबारे छानबिन गर्न गठित आयोगले दुवै नेताविरुद्ध फौजदारी मुद्दा अघि बढाउन सिफारिस गरेको थियो। सोही सिफारिसका आधारमा शनिबार पक्राउ पुर्जी जारी गरी उनीहरूलाई नियन्त्रणमा लिइएको हो।

अदालतमा आज लेखक स्वयं उपस्थित भएका थिए भने ओली स्वास्थ्य समस्याका कारण त्रिवि शिक्षण अस्पताल मार्फत भर्चुअल रूपमा उपस्थित भएका थिए।

घटनाक्रमले नेपाली राजनीति तताएको छ भने आगामी दिनमा यस प्रकरणले थप तरंग ल्याउने संकेत देखिएको छ।